باش بەت > ئىبادەت > ئىبادەتلەر > روزا ۋە ھېيت  يوللىغۇچى: ، ۋاقتى:

 ئەسسەلامۇ ئەلەيكۇم مۆھتەرەم قېرىنداشلار!

بىز ھازىر ھىجرىيە 1430– يىلى زۇلقەئدە  ئېيىنىڭ (ھىجرىيىنىڭ 11- ئېيىنىڭ) ئاخىرقى كۈنلىرىدە ياشاۋاتىمىز. ئەتە ئاخشام ياكى ئۆگۈن ئاخشام كۆرۈنىدىغان يېڭى ئاي زۇلھەججە ئېيىنىڭ (ھىجرىيىنىڭ 12- ئېيىنىڭ) يېڭى ئېيىدۇر. زۇلھەججە ئېيىنىڭ ئاۋۋالقى ئون كۈنى دىنىمىزدا خاسىيەتلىك كۈنلەردىن ھېسابلىنىدۇ. بۇ ئون كۈننىڭ خاسىيىتىنى بىلىش ۋە بۇ ئون كۈندە تەۋسىيە قىلىنغان ئىشلارنى قىلىش، چەكلەنگەن ئىشلاردىن ساقلىنىش بىر مۇسۇلمان ئۈچۈن ناھايىتى ئەھمىيەتلىكتۇر. شۇڭا مەن (ئەبۇلفاتىھ) بۇ ئون كۈن توغرىسىدا قىسقىچە توختىلىمەن.
1- بۇ ئون كۈننىڭ خاسىيىتىنىڭ دەلىللىرى:  
ئا- زۇلھەججە ئېيى ئۇرۇش ھارام قىلىنغان ئايلارنىڭ بىرىدۇر.
ئە- ئاللاھ تەئالا 89 – سۈرە (فەجر) نىڭ 2 – ئايىتىدە بۇ ئاينىڭ دەسلەپكى ئون كېچىسى بىلەن قەسەم قىلغان.
ب- ئاللاھ تەئالانىڭ «بۈگۈن سىلەرنىڭ دىنىڭلارنى پۈتۈن قىلدىم، سىلەرگە نېمىتىمنى تاماملىدىم، ئىسلام دىنىنى سىلەرنىڭ دىنىڭلار بولۇشقا تاللىدىم» (مائىدە 5/3) دېگەن ئايىتى بۇ ئاينىڭ 9 كۈنى نازىل قىلىنغان ۋە بۇ كۈنى بۇ ئايەت 100 مىڭدىن ئارتۇق ساھابىنىڭ ئىچىدە ئوقۇلۇش ئارقىلىق دىنىمىزنىڭ پۈتۈن قىلىنغانلىقى ئېلان قىلىنغان.
پ- بىز مۇسۇلمانلارنىڭ ئىككى دىنى بايرىمىمىزنىڭ بىرى بولغان قۇربان ھېيت بۇ ئاينىڭ 10 – كۈنى بولىدۇ.
2- بۇ ئون كۈندە قىلىنىدىغان ئىشلار:
قېرىنداشلار! بۇ ئون كۈن بىر مۇسۇلمان ئۈچۈن ياخشى پۇرسەتلەرنىڭ بىرى ھېسابلىنىپ، بۇ پۇرسەتنى غەنىمەت بىلىپ، ئىبادەت بىلەن ئۆتكۈزۈش ياخشى ئىشتۇر.
پەيغەمبەر ئەلەيھىسسالامنىڭ بۇ ئون كۈن بىلەن مۇناسىۋەتلىك ھەدىسلىرىدىن بۇ كۈنلەردە مۇنۇ ئىشلارنى قىلىشنىڭ ياخشى ئىكەنلىكى چىقىدۇ:
1- بۇ كۈنلەردە، بولۇپمۇ بۇ كۈنلەرنىڭ 9 – كۈنى بولغان ئەرەپە كۈنىدە (ئەتە ھېيت نامىزى ئوقۇلىدۇ دېگەن كۈنى) روزا تۇتۇش ياخشىدۇر. لېكىن ئەرەپاتتىكى ھاجىلارنىڭ بۇ كۈنى روزا تۇتۇشى چەكلەنگەن.
بۇ ئاينىڭ ئونىنچى كۈنى روزا تۇتۇشقا بولمايدۇ. چۈنكى بۇ ئاينىڭ ئونىنچى كۈنى ھېيت كۈنى بولۇپ، پەيغەمبەر ئەلەيھىسسالام بۇ كۈندە روزا تۇتۇشتىن مەنئى قىلغان.
2- كۆپلەپ نەپلە ناماز ئوقۇش، يەنى بۇ كۈنلەردە پەرز نامازلارنى ئوقۇغاندىن سىرت كۆپلەپ نەپلە ناماز ئوقۇش ياخشىدۇر.
3- تەكبىر، تەھلىل ۋە تەھمىد ئوقۇش يەنى «ئەللاھۇ ئەكبەر، ئەللاھۇئەكبەر، لائىلاھە ئىللەللاھۇ ۋەللاھۇ ئەكبەر، ئەللاھۇ ئەكبەر ۋەلىللاھىلھەمدۇ» دېگەن زىكىرلەرنى ھەر پۇرسەتتە ئوقۇش ياخشىدۇر.
 ئۇ تەكبىر، تەھلىل ۋە تەھمىدلەرنىڭ تەرجىمىسى: «ئاللاھ بۈيۈكتۇر، ئاللاھ بۈيۈكتۇر، ئاللاھدىن باشقا ھېچ ئىلاھ يوقتۇر، ئاللاھ بۈيۈكتۇر، ئاللاھ بۈيۈكتۇر، ئاللاھقا شۈكۈرلەر بولسۇن».
4- ئونىنچى كۈنى قۇربانلىق قىلىش. قۇربانلىق قىلىش بۇ كۈنلەردىكى ياخشى ئىشلارنىڭ ئەڭ يۇقىرىسى ھېسابلىنىدۇ.
5- ئۆزىمىزنى بىر تەكشۈرۈپ چىقىشىمىز، ئەگەر ھازىرغا قەدەر ياخشى ئىش قىلغان بولساق، ئالغا ئىلگىرىلىشىمىز؛ ئەگەر يامان ئىش قىلغان بولساق، تەۋبە قىلىپ ئۆزىمىزنى ئىسلاھ قىلىشىمىز كېرەك.
3- بۇ ئون كۈندە قىلىش ياخشى بولمايدىغان ئىشلار:
قۇربانلىق قىلماقچى بولغان كىشى چاچ ۋە تىرناقلىرىنى ئالماي ھېيت كۈنى قۇربانلىق قىلىپ بولۇپ، ئاندىن ئېلىشى ياخشىدۇر. چۈنكى پەيغەمبەر ئەلەيھىسسالامنىڭ: «قۇربانلىق قىلماقچى بولغان كىشى زۇلھەججە ئېيى كىرىپ قالسا تاكى قۇربانلىق قىلغانغا قەدەر، بەدىنىدىكى تۈك ۋە تىرناقلاردىن ھېچ نەرسىنى ئالمىسۇن» دېگەن مەزمۇندا بىر  ھەدىسى بار.- مۇسلىم رىۋايەت قىلغان.

مۇسۇلمانلار تورى، ئاللاھ، ئاللا، قۇرئان كەرىم، مۇسۇلمان، مۇسۇلمانلار، قۇرئان، ھەدىس، ئىلىم، دىن، ئۇيغۇر، ئۇيغۇرچە، فېترەت، فىترەت، تەبىئەت، ئادەم، پەيغەمبەر، رەسۇل، نەبى، شېئىر، ئۆلىما، مەزھەپ، پەتىۋا، سۇئال، جاۋاب، ئىلمىي، تەتقىقات، ماقالە، يازمىلار، يازما، ئۇلىنىش، ئالاقىلىشىڭ